|
Reiltys Jee-veanit ayns Nalbin as Bretin
|
|
|
Ren reiltys Lunnin cur er bun ard-whaiyl ayns Sostyn as quaiyl pholitickagh ayns Bretin. Gyn ourys, va lught reiltys Lunnin treishteil dy jinnagh shen cur kione er treishtyn son seyrsnys kiart ayns ny cheeraghyn shen. Yiowmayd magh.
|
|
|
Hannah, ta lught reiltys Lunnin cheet dy ve boirit mychione jee-veanaghey (devolution), erskyn ooilley ayns Nalbin. Ta ny hAlbinee geddyn rey rish taillaghyn-ynsee son studeyryn ayns ollooscoillyn, as t'ad mooadaghey ny faillyn ta ynseyderyn-scoill geddyn foddey ny smoo na ayns Sostyn as Bretin. Gollrish Sostnee ennagh, cha nod ymmodee Albinee toiggal cre'n fa ta polaseeyn Thoree ec reiltys Lunninagh ta goll er stiurey ec Partee 'Obbraghys'. Ta reiltys Tony Blair geddyn rey rish toyrtyssyn son studeyryn as cur orroo geeck taillaghyn-ynsee. Ec y traa cheddin, cha nod y reiltys shen toiggal cre'n fa nagh vel tooilley sleih aeg veih 'brastyl ny hobbreeyn' (cha nod ny Sostnee jannoo fegooish anchaslys-brastyl) jannoo coorseyn ollooscoill! S'aashagh geddyn yn ansoor cha nel argid dy liooar oc ny chour. Ga dy row lught yn Phartee Obbraghys ayns Nalbin noi geddyn rey rish taillaghyn-ynsee, begin daue croymmey sheese as adsyn fo baggyrtys y theay Albinagh.
|
|
|
Red elley ta goll noi Lunnin, shen dy bee shenn sleih ayns Nalbin geddyn kiarail persoonagh nastee. Tra dooyrt Albinee dy row ad goll dy yannoo shoh, va lught Lunnin goll ass nyn geeall ('Cha nel shinyn laccal soshiallys!'). Agh cha dod lught Lunnin jannoo monney, er y fa dy beagh y co-reiltys jeh’n Phartee Obbraghys as y Partee Deynlagh Libraalagh tuittym veih my cheilley dy beagh y treealtys son kiarail persoonagh son shenn sleih ayns Nalbin ceaut magh ec lught y Phartee Obbraghys ayns Nalbin. Va rieau coarys-leigh er lheh as coarys-ynsee er lheh ec Nalbin. As ayns Nalbin, feallagh aegey t'er vrishey yn leigh, cha nel ymmodee jeu goll stiagh ayns quaiyllyn (as er y raad dys bea jeh kimmeeys, dy mennick). Syn ynnyd jeh shen, t'ad goll dys buird-resoonee (hearing panels). Shimmey peiagh ta coontey ram jeh ny buird-resoonee shoh.
|
|
|
T'eh jeeaghyn dy jean jee-veanaghey mooadaghey anchaslyssyn myr shoh, ga dy vel Lunnin feer faitagh mychione y lheid. S'cooin lesh ny Sostnee ny haink er Bnr Thatcher (Y Thooder) tra hug ee er ny h-Albinee geeck yn keesh persoonagh (poll tax). Ga dy dug shoh corree agglagh er ny hAlbinee, hug ny Thoreeyn er sleih fud y Reeriaght Unnaneyssit y keesh shoh 'eeck. Va shoh yn ard oyr va’n Thooder ceaut magh sy jerrey.
|
|
|
Ga nagh vel quaiyl pholitickagh Vretin cho pooaral as ard-whaiyl Nalbin, ta ny Bretnee jeeaghyn da’n teihll dy vod ad scarrey rish Sostyn ayns cooishyn ennagh.
|
|
|
Ren co-hionnal Vretin pointeil barrantagh son paitçhyn, ga dy row shirveishee-reiltys Lunninagh dy bollagh noi shoh. Ren ny Bretnee shoh kyndagh rish coyrle haink ass brialtys mychione drogh reddyn va jeant noi paitçhyn ayns thieyn-paitçhyn ayns twoaie Vretin. Geiyrt er shen, t'eh jeeaghyn dy bee Nerin Twoaie as Nalbin pointeil barrantee-paitçhyn neesht. Agh t'eh jeeaghyn nagh bee ny Sostnee jannoo y lheid, ga dy vel ram sleih ayns Sostyn laccal eh! Myr ta'n ard-reiragh jeh’n Cheshaght ry hoi Lhiettal Dewillys da Paitchyn (SLDP) gra, cha nel sthap currit da raghtalys noi paitçhyn ec y clyst eddyr Bretin as Sostyn. Lhisagh barrantee-paitçhyn goll er pointeil ayns Sostyn neesht dy ronsaghey skeealyn jeh raghtalys noi paitchyn. Mannagh vees shen jeant, ta’n SLDP laccal y barrantagh Bretnagh dy ve lowit dy chur coyrle mychione polaseeyn Lunninagh ta jannoo er paitchyn ayns Bretin (myr sampleyr, y faill sloo son feallagh aegey). As lhisagh y barrantagh Bretnagh ve abyl dy ronsaghey ny cooishyn jeh paitchyn Bretnagh ta currit dys Sostyn.
|
|
|
Anchaslys elley eddyr Sostyn as Bretin ta cheet rish, shen yn aght vees rick goll er freayll orroosyn ta jeeaghyn mysh paitchyn as orroosyn ta stiurey as gobbraghey ayns scoillyn son paitchyn ta feer aeg. Ayns Sostyn, bee yn obbyr shoh jeant ec Ofsted, adsyn ta scrutaghey scoillyn. Agh ayns Bretin, bee yn obbyr jeant ec barrantys stundayrtyn-kiarail (care standards commission). Ta ny Bretnee (gollrish ymmodee Sostnee) smooinaghtyn dy vel ny cooishyn shoh ny smoo lhean na cooishyn-scoill.
|
|
|
Myr shen, ta jee-veanaghey cur Sostyn fo traastey dy gholl ersooyl veih polaseeyn Thoree. Ta anchaslys undinagh eddyr Sostyn er yn derrey laue as Bretin as Nalbin er yn jeh elley. She co-reiltyssyn t'ayn ayns Caerdydd as Doon Edin as ta Lunnin foast smooinaghtyn dy vel co-reiltyssyn myr obbyr y jouyl. Agh ta co-reiltys eginit dy eaishtagh rish ny smoo na un phossan. Ta sorch noa dy pholitickaght goll er ynsaghey ayns Caerdydd as Doon Edin. Ny veggan as ny veggan, ta Nalbin as Bretin cheet dy vel gollrish cheeraghyn ayns y Cheer Vooar Oarpagh.
|
|
|
Va barriaght veg elley er ny cosney son jee-veanaghey er y gherrid. Lesh polasee Thoree elley, ta reiltys Lunnin prowal dy chleayney arryltee dy obbraghey nastee dy chooney lesh shirveishyn theayagh gollrish yn chirveish-slaynt (er y fa nagh vel y reiltys shen arryltagh dy eeck faillyn cairal da sleih ta gobbraghey son ny shirveishyn shen). As shegin shickyraghey nagh bee ny h-arryltee jannoo reddyn olk - oddagh kimmee goaill ymmyd jeh'n chaa shoh dy yannoo cragh. Son shickyraghey oikoil, ta reiltys Lunnin laccal jeih punt veih gagh arryltagh (creid eh ny dyn). Agh cha bee arryltee ayns Nalbin geeck veg. Cooish veg t'ayn, foddee, agh t’eh soilshaghey yn aght peajogagh ta reiltys Lunnin smooinaghtyn. Vel reiltys Lunnin er nynsaghey veg? Dooyrt fer mooar sy reiltys shen, Gordon Brown, dy vel Goaldee goll ersooyl veih fuirraghtyn rish Lunnin dy yannoo reddyn daue. Syn ynnyd jeh shen, ta sleih jerkal rish kiannoortys ynnydagh. Cha nel shin er nakin monney jeh shen veih Brown as e chumraagyn ayns mean Hostyn.
|
|
|
|
Summary
|
|
|
The UK government hoped to scupper moves for Scottish and Welsh independence by setting up the Scottish Parliament and the Welsh Assembly. Recent developments in Scotland and Wales suggest that the cat might still get out of the bag
|
|
Brian Stowell
|
|